Fulltrúaráð Auðhumlu svf. 2026

Allar 14 deildir Auðhumlu svf. hafa nú í marsmánuði haldið aðalfundi sína þar sem félagsmenn hverrar deildar fyrir sig hafa kosið sinn/sína fulltrúa í fulltrúaráð Auðhumlu svf. fyrir árið 2026. 

Á aðalfundi deildanna er fyrst kjörinn deildarstjóri til eins árs í senn. Deildarstjórinn verður sjálfkrafa einn af fulltrúum deildarinnar í fulltrúaráðinu. Að því loknu eru kosnir aðrir aðalfulltrúar deildarinnar, en kjósa skal einn fulltrúa til eins árs í senn fyrir hver 12 virk innleggsnúmer deildarinnar og brot af þeirri tölu, þannig að ef innleggsnúmer deildarinnar eru 12 eða færri skal fulltrúinn vera einn (þ.e. deildarstjórinn, sbr. það sem að framan sagði), tveir ef innleggsnúmerin eru 13-24 o.s.frv. Varafulltrúar hverrar deildar fyrir sig skulu vera jafnmargir aðalfulltrúum og eru þeir kallaðir til ef þarf í þeirri röð sem atkvæðafjöldi hvers og eins segir til um. Fyrsti varafulltrúi er þannig sá félagsmaður sem hlaut flest atkvæði sem varafulltrúi, annar varafulltrúi sá sem hlaut næst flest atkvæði o.s.frv.

Talning virkra innleggsnúmera skal miðuð við 31. desember næsta árs fyrir aðalfundi deildanna.

Fulltrúar allra félagsdeildanna mynda fulltrúaráðið og þeir einir fara með atkvæði á fulltrúaráðsfundum.  Fulltrúaráðið er þannig æðsta vald Auðhumlu svf. þar sem það kýs stjórn félagsins og varamenn í stjórn, svo og skoðunarmenn og varamenn þeirra, ásamt endurskoðanda. 

Fulltrúar í fulltrúaráði Auðhumlu svf. 2026

Til baka