Stofnsjóður Auðhumlu svf.
Stofnsjóður er framlag félagsmanna til að skapa rekstrargrundvöll fyrir félagið. Stofnsjóður Auðhumlu er myndaður af séreignahlutum félagsaðila. Í hann er lagt aðildargjald félagsaðila í upphafi félagsaðildar en auk þess skal leggja fram ákveðið hlutfall af verðmæti hvers innvegins mjólkurlítra. Aðalfundur ákveður þetta tillag ár hvert fyrir eitt ár í senn. Framlög í séreignahluta stofnsjóðs eru færð á sérstakan reikning hvers félagsaðila og fær viðkomandi aðili árlega sent yfirlit um stofnsjóðseign sína hjá félaginu.
Stofnsjóðurinn skal árlega vaxtareiknaður og verðbættur. Við þá ákvörðun skal að jafnaði hafa til viðmiðunar almenna sparisjóðsvexti og verðbætur í samræmi við almennar verðbreytingar í þjóðfélaginu. Við útreikning vaxta og verðbóta skal þó tekið tillit til afkomu og fjárhagslegrar stöðu félagsins eins og segir í 20. grein samþykkta Auðhumlu svf.- en ákvörðun um ávöxtun stofnsjóðs liðins árs tekur aðalfundur Auðhumlu svf. hverju sinni. Þessir reiknuðu vextir og verðbætur bætast við höfuðstól séreignahlutans.
Aðalfundur getur ákveðið hækkun séreignahluta á þann hátt að yfirfæra fjárhæðir sem eftir standa þegar félagið hefur ráðstafað hagnaði og ákveðið tillög í sjóði. Tillagan um hækkun þarf samþykki 2/3 hluta greiddra atkvæða á aðalfundi.
Stofnsjóður hvers félagsmanns fellur til útborgunar:
- við andlát hans,
- er félagsaðild fellur niður
- við gjaldþrot hans.
Jafnframt getur félagsmaður óskað eftir því að Auðhumla svf. greiði honum stofnsjóðseign sína ef hann hefur náð 70 ára aldri, enda þótt hann haldi áfram þátttöku í félaginu - eins og segir í 2. mgr. 38 gr. laga um samvinnufélög.
Aldrei má þó borga út stofnsjóðseign fyrr en eigandi hefur innt af hendi allar fjárhagslegar skuldbindingar er á honum hvíla sem félagsmanni.
Félagsaðild lýkur við afgreiðslu ársreiknings þess árs er viðskiptum með mjólkurinnlegg var hætt sbr. 21. grein samþykkta Auðhumlu svf., nema um tímabundna rekstrarstöðvun sé að ræða vegna aðstæðna sem ekki verður við ráðið. Auðhumla svf. skal þá greiða félagsaðila að fullu séreignahluta hans eigi síðar en 1. júlí á því ári sem á eftir fer, en stjórn félagsns er þó heimilt að fresta greiðslu séreignarhluta í allt að 12 mánuði.
Stofnsjóðsfé er óuppsegjanlegt og verður ekki selt né af hendi látið nema með samþykki félagsstjórnar.
Nánari upplýsingar eru veittar hjá framkvæmdastjóra.
Síða uppfærð: 27.02.2026