Dreifing mjólkurvara með mjólkurbílum hættir um áramót

Stjórn Auðhumlu svf. hefur ákveðið að dreifingu mjólkurvara með mjólkurbílum MS til mjólkurframleiðenda skuli hætt frá áramótum 2026/2027.

Ástæður þessarar ákvörðunar eru eftirfarandi:

• Ekki er hægt að tryggja órofna kælingu mjólkurvara þegar þær eru sendar með mjólkurbíl og það getur haft áhrif á geymsluþol þeirra. MS er óheimilt að stunda vörudreifingu mjólkurvara með bílum sem ekki hafa geymslukassa með kælibúnaði.
• Nýta þarf pláss og burðargetu mjólkurbíla og dráttarvagna til hins ítrasta fyrir mjólkina sjálfa sem sótt er til bænda.
• Samfélagið hefur breyst, samgöngur auðveldari og kaupstaðaferðir bænda til að afla sér daglegra nauðsynja ekki lengur neitt tiltökumál víðast hvar.
• Ekki er hægt að tryggja jafnræði þjónustunnar til allra mjólkurframleiðenda þar sem aðstæður MS til að taka saman pantanir og geyma í mjólkurbílamóttöku eru mjög misjafnar eftir afurðastöðvum.
• Matvöruverslanir eru farnar að gera út sérstaka bíla sumstaðar til að keyra vörur út um sveitir landsins. Dreifing dagvöru með mjólkurbílum í samkeppni við þá gæti orkað tvímælis.

Allar upplýsingar um almenna vörudreifingu Mjólkursamsölunnar má nálgast á heimasíðu félagsins á slóðinni: https://www.ms.is/pantanir-og-dreifing

Til baka