SAMÞYKKTIR FYRIR AUÐHUMLU SVF.

SAMÞYKKTIR

I. KAFLI
HEITI OG TILGANGUR

1. gr.
Félagið heitir Auðhumla svf.  Heimili félagsins og varnarþing er að Bitruhálsi 1, Reykjavík.

Félagið skal rekið á samvinnugrundvelli með takmarkaðri ábyrgð samkvæmt lögum um samvinnufélög.

2. gr.
Tilgangur félagsins er að taka á móti mjólk frá félagsmönnum, breyta henni í söluhæfa vöru, dreifa henni og selja fyrir sem best verð.  Þá er félaginu heimilt að reka aðra starfsemi, sem gæti dregið úr rekstrarkostnaði félagsins og verið til hagræðis og styrktar fyrir félagið og félagsaðila.  Félaginu er jafnframt heimilt að fela utanaðkomandi aðila hluta af verkefnum sínum.  Tilgangi sínum hyggst félagið ná með því m.a. að:

1. Reka afurðastöðvar (mjólkurbú).
2. Stunda öflugt og skilvirkt sölu- og markaðsstarf með framleiðsluvörur félagsins og aðrar vörur eftir því sem henta þykir.
3. Vera aðili að Mjólkursamsölunni ehf.
4. Vera aðili að Osta- og Smjörsölunni sf.
5. Vera aðili að Samtökum afurðastöðva í mjólkuriðnaði.
6. Leiðbeina félagsmönnum um meðferð mjólkur.
7. Annast flutninga í eigin þarfir, fyrir félagsmenn og aðra.


II. KAFLI.
FÉLAGSMENN – ÁBYRGÐ

3. gr.
Mjólkurframleiðendur geta orðið félagsaðilar að Auðhumlu leggi þeir að staðaldri inn mjólk í einhverja af afurðastöðvum félagsins.  Upphæð aðildargjalds, sem greiðist við inngöngu í félagið, skal ákveðið á aðalfundi ár hvert.  Aðildargjaldið rennur í stofnsjóð félagsaðila. 

4. gr.
Sá sem óskar eftir því að gerast félagsaðili í Auðhumlu skal snúa sér til stjórnar félagsins með beiðni um aðild.  Einstaklingar, þ.m.t. aðilar félagsbúa og þeir sem samskattaðir eru vegna mjólkurframleiðslu, og lögaðilar geta orðið félagsaðilar.

Félagatal skal geymt á skrifstofu félagsins.  Eftir að stjórn hefur samþykkt aðildarumsókn skal nafni og heimilisfangi nýs félagsaðila bætt á félagatalið, um leið og þeir gerast félagsaðilar.  Þá skal koma fram hvaða deild félagsaðilar tilheyra.  Við nöfn þeirra sem hætta að vera félagar, skal skrá dag og ár, er þeir fara úr félaginu. 

Framkvæmdastjórar og stjórnarmenn lögaðila, sem eru félagsaðilar, geta óskað skráningar í félagatal, enda starfi þeir að verulegu leyti við framleiðsluna.  Þeir skulu aðgreindir frá félagsaðilum í félagatali, með sérstakri merkingu. 

Þeir einstaklingar, sem eru á félagatali, eru kjörgengir í stjórn félagsins og fulltrúaráð.  Skráning í félagatal felur í sér rétt til setu á deildarfundum og á aðalfundum félagsins með málfrelsi og tillögurétti. 

Hver félagsaðili fer þó aðeins með eitt atkvæði á deildarfundum. 

5. gr.
Félagsréttindum halda félagsaðilar meðan þeir skipta við félagið með þeim hætti að senda því mjólk, uns lokið er afgreiðslu reiknings þess árs, er viðskiptum var hætt, sbr. þó 4. mgr. 8. gr. samþykktanna.

6. gr.
Félagsaðili getur sætt brottvikningu úr félaginu:
a) Ef hann verður ber að því að spilla áliti félagsins eða vinna gegn hagsmunum félagsins.
b) Ef hann er félagsmaður að yfirvarpi, en hefur mestöll viðskipti sín annarsstaðar.
c) Ef hann sýnir félaginu ítrekuð vanskil.
Nú ályktar stjórnin, að félagsaðili skuli víkja úr félaginu, og skal hún þá tilkynna honum það skriflega.  Um útborgun séreignahluta félagsaðilans fer sem í 21. gr. segir.  Félagsaðili getur skotið máli sínu til næsta aðalfundar.


III. KAFLI.

FULLTRÚARÁÐ OG STJÓRN

7. gr.
Félagið skiptist í eftirtaldar deildir:
Austurlandsdeild
Austur-Skaftafellsdeild
Skaftárdeild
Mýrdalsdeild
Eyjafjalladeild
Landeyjadeild
Fljótshlíðar-, Hvols- og Rangárvalladeild
Holta-, Landmanna-, Ása- og Djúpárdeild
Biskupstungna-, Laugardals- og Grímsnesdeild
Skeiða- og Gnúpverjadeild
Hrunamannadeild
Gaulverjabæjar-, Villingaholts- og Stokkseyrardeild
Hraungerðis-, Sandvíkur- og Ölfusdeild
Hvalfjarðardeild
Borgarfjarðardeild
Mýrasýsludeild
Snæfellsnesdeild
Breiðafjarðardeild
Vestur-Húnaþingsdeild
Austur-Húnaþingsdeild
Norðausturdeild

Fulltrúaráð er kosið þannig að á aðalfundi hverrar deildar Auðhumlu skulu fyrst kjörnir deildar- og varadeildarstjóri til eins árs í senn.  Deildarstjórinn verður sjálfkrafa einn af fulltrúum deildarinnar í fulltrúaráðinu.  Kjósa skal einn fulltrúa til eins árs í senn fyrir hver 9 innleggsnúmer deildarinnar og brot af þeirri tölu, þannig að ef innleggsnúmer deildarinnar eru 9 eða færri skal fulltrúinn vera einn (þ.e. deildarstjórinn, sbr. það sem að framan sagði), tveir ef innleggsnúmerin eru 10-18 o.s.frv.  Talning virkra innleggsnúmera skal miðuð við 31. desember næsta árs fyrir aðalfundi deildanna.

Fulltrúar allra félagsdeildanna mynda fulltrúaráðið og þeir einir fara með atkvæði á fulltrúaráðsfundum.  Fulltrúaráðið kýs stjórn félagsins og varamenn í stjórn, svo og skoðunarmenn og varamenn þeirra, ásamt endurskoðanda. 

Kjörgengir til allra starfa á vegum félagsins, annarra en starfs endurskoðanda, eru allir þeir sem skráðir eru í félagatal, sbr. 4. gr.

8. gr.
Aðalfundur (sjá 15. gr) kýs sjö menn í stjórn og þrjá til vara.  Kjörtímabil stjórnar og varastjórnar er eitt ár.  Kosning stjórnar og varastjórnar skal vera skrifleg.

Kosnir skulu tveir skoðunarmenn og tveir til vara til tveggja ára í senn.  Ganga þeir út sitt árið hvor.

Endurskoðandi skal kosinn til eins árs í senn.

Hætti stjórnarmaður, fulltrúi á fulltrúaráðsfundum eða skoðunarmaður að leggja inn mjólk hjá félaginu skal hann víkja sæti fyrir varamanni, þegar til umfjöllunar verða á fundum viðkvæm viðskiptaleyndarmál félagsins.  Stjórn félagsins ákvarðar hvað teljist viðkvæm viðskiptaleyndarmál félagsins.

9. gr.
Stjórnin skiptir sjálf með sér verkum.  Formaður stjórnar kveður stjórnina til funda og stjórnar þeim.  Stjórnarfundur er lögmætur, ef fjórir stjórnarmenn hið fæsta sækja hann.  Úrslitum mála ræður afl atkvæða, en séu þau jöfn, ræður atkvæði formanns.  Allar fundargerðir stjórnarinnar skulu ritaðar í gerðabók, og skrifa viðstaddir stjórnarmenn undir þær.

Stjórnin boðar til aðalfundar og annarra fulltrúaráðsfunda og undirbýr fundarmálefni, framkvæmir fundarályktanir og annast störf milli funda, leggur fyrir aðalfund fulltrúaráðsins til úrskurðar endurskoðaða reikninga félagsins fyrir næsta ár á undan, hefur eftirlit með húsum, áhöldum og öðrum eignum félagsins, gætir hagsmuna þess í öllum greinum og getur leitað aðstoðar landslaga og réttar í málefnum félagsins ef þörf krefur.  Stjórn og forstjóra er heimilt að taka nauðsynleg stofn- og  rekstrarlán gegn veði í eignum félagsins.

10. gr.
Félagsstjórn ræður forstjóra og felur honum það af störfum sínum er henni sýnist, eða fulltrúaráðsfundur ákveður.  Hún gerir við hann starfssamning og semur um laun hans.  Samningurinn skal vera uppsegjanlegur af beggja hálfu með ákveðnum fyrirvara. 

11. gr.
Störf þau er félagsstjórn felur forstjóra, eru einkum þessi:
a) Að standa fyrir daglegum rekstri félagsins, annast um kaup og sölu á vörum, flutningi þeirra, geymslu og afgreiðslu.
b) Að hafa umsjón með húseignum félagsins, áhöldum og öðrum fjármunum, er félagið á eða hefur til umráða.
c) Að sjá um að vörur félagsins og allar aðrar eignir þess séu jafnan vátryggðar fyrir fullt verð.
d) Að ráða starfsmenn félagsins og semja um laun þeirra í samráði við stjórn félagsins.
e) Að annast bréfagerðir félagsins, bókhald og reikningsskil og inna af hendi allar fjárreiður þess.
f) Að vera stjórn félagsins til ráðuneytis um allt er varðar hag þess og rekstur.

Forstjóri skal gera grein fyrir starfsemi félagsins á aðalfundi fulltrúaráðsins ár hvert og hvenær sem stjórnin æskir þess.  Forstjóri skal hafa samráð við stjórnina um allt, sem máli skiptir.


12. gr.
Allir þeir samningar, er stjórnin, eða forstjóri í hennar umboði, gera fyrir hönd félagsins, samkvæmt samþykktum þessum eða ályktunum fulltrúaráðsfundar, eru bindandi fyrir félagsheildina og hvern einstakan félagsaðila.

Firmað rita fjórir stjórnarmenn saman.  Forstjóri hefur prókúruumboð.  Stjórn og forstjóri bera ábyrgð gerða sinna fyrir aðalfundi fulltrúaráðsins, stjórnarmenn einn fyrir alla og allir fyrir einn, nema sá er látið hefur bóka ágreiningsatkvæði í gerðabók félagsins.

13. gr.
Aðalfundur kýs endurskoðanda eða endurskoðendafélag auk tveggja skoðunarmanna. Skoðunarmenn skulu vera á félagatali, en mega ekki vera í stjórn félagsins.


IV. KAFLI.
FÉLAGSFUNDIR

14. gr.
Fulltrúaráðsfundir hafa æðsta vald í málefnum félagsins. 

Í hverri deild félagsins skal halda fund að minnsta kosti einu sinni á ári, aðalfund og deildarfundi, ef fulltrúum þykir ástæða til, eða þeir fá um það rökstudd tilmæli helmings þeirra manna, sem í deildinni eru.  Á aðalfundi deildanna skal kjósa deildarstjóra og varadeildarstjóra, aðal- og varafulltrúa fyrir deildina samkvæmt 2. mgr. 7. gr., ræða sérmál deildarinnar og félagsins í heild, gera ályktanir um mál, sem félagið varða og koma eiga fyrir næsta fulltrúaráðsfund.  Deildarstjóri skal kalla saman deildarfundi og stýra þeim ef ekki er kosinn sérstakur fundarstjóri.  Deildarstjóri skal þegar að afloknum aðalfundi deildar senda aðalskrifstofu félagsins fundargerðina og tilkynningu um fulltrúakjör (kjörbréf), svo að skrá um fulltrúa geti legið fyrir í byrjun aðalfundar fulltrúaráðs.  Heimilt er deildum að sameinast um aðalfundi sína og aðra deildarfundi.  Á aðalfundi deildanna skal jafnan mæta forstjóri félagsins eða fulltrúi hans og/eða fulltrúi úr stjórn og gera grein fyrir rekstri félagsins og kynna afkomu liðins árs.  Þar skal jafnframt mæta forstjóri eða fulltrúi forstjóra Mjólkursamsölunnar ehf. og gera grein fyrir rekstri félagsins og afkomu.

Á aðalfundi hverrar deildar skal liggja frammi skrá um félaga í deildinni.

15. gr.
Aðalfund fulltrúaráðs skal halda, svo fljótt sem verða má, að afloknu uppgjöri á ársreikningi félagsins, og eigi síðar en í apríl mánuði.

Til aðalfundar boðar stjórnin með minnst 7 daga fyrirvara.  Boða skal fulltrúa skriflega, en jafnframt skal auglýsa fundinn með almennri auglýsingu í a.m.k. einum prentmiðli. 

Þessi skulu vera störf aðalfundar:
1. Skýrsla stjórnar.
2. Skýrsla um starfsemi Mjólkursamsölunnar ehf.
3. Lagðir fram til afgreiðslu endurskoðaðir reikningar fyrir síðastliðið ár.
4. Kosið í stjórn samkvæmt 1. mgr. 8. gr.
5. Kosnir skoðunarmenn samkvæmt 2. mgr. 8. gr
6. Kosinn endurskoðandi, samkvæmt 3. mgr. 8. gr.
7. Ákveðin upphæð aðildargjalds, samkvæmt 3. gr.
8. Ákveðin þóknun stjórnar, skoðunarmanna og fulltrúa á líðandi ári.
9. Önnur mál löglega upp borin.

Aðalfundur er lögmætur, þegar fulltrúar frá meira en helmingi félagsdeilda sækja fundinn, enda séu á fundi meiri hluti þeirra fulltrúa, sem þar eiga atkvæðisrétt.  Hver fulltrúi fer með eitt atkvæði á fulltrúaráðsfundum.

Nú verður aðalfundur ekki lögmætur, og skal boða til fundar að nýju með 7 daga fyrirvara.  Er sá fundur lögmætur, án tillits til þess, hve margir fulltrúar sækja hann.  Aðalfundur skal vera opinn öllum þeim sem eru á félagaskrá, og hafa þeir þar málfrelsi og tillögurétt.

16. gr.
Deildarfundi og fulltrúaráðsfundi skal boða skriflega með 7 daga fyrirvara.  Á félagsfundum verða ekki gerðar bindandi samþykktir um önnur efni en getið er um í fundarboði eða kynnt fulltrúum og/eða félagsaðilum með öðrum hætti með hæfilegum fyrirvara.

17. gr.
Aukafund getur félagsstjórnin boðað fulltrúaráðinu, ef henni þykir þess þörf, og skylt er henni að boða til aukafundar, er þriðjungur fulltrúa eða skoðunarmenn eða endurskoðandi krefjast þess og greina fundarefni.

18. gr.
Úrslitum mála á félagsfundum, hvort sem um er að ræða aðalfundi, fulltrúaráðsfundi eða deildarfundi, ræður afl atkvæða með þeim undantekningum sem greinir í samþykktum þessum.

19. gr.
Í gerðabók skal rita allar samþykktir, sem gerðar eru á fundum félagsdeilda og fulltrúaráðs, og stuttlega sagt frá gangi mála, svo að gerðabókin sé trúverðug heimild um það, sem fram fer á fundum.  Fundarstjóri og fundarritari undirrita gerðabókina, er fundargerð hefur verið lesin í heyranda hljóði og samþykkt af fundarmönnum.


V. KAFLI
SJÓÐIR OG VELTUFÉ

20. gr.
Stofnsjóður Auðhumlu skal myndaður af séreignahlutum félagsaðila.  Í hann skal leggja aðildargjald félagsaðila, samkvæmt 3. gr. samþykkta þessara.  Í stofnsjóð skal félagsaðili ennfremur leggja ákveðna upphæð af hverjum innvegnum lítra mjólkur.  Aðalfundur ákveður þetta tillag ár hvert fyrir eitt ár í senn.  Áður en aðalfundur ákveður tillög í sjóði og ráðstöfun tekjuafgangs skal tap, sem ekki hefur verið jafnað, dregið frá, og eignir félagsins, fastar og lausar, afskrifaðar nægilega samkvæmt ákvörðun stjórnar.

Framlög í séreignahluta stofnsjóðs skulu færð á sérstakan reikning hvers félagsaðila og skal halda skrá sem sýni hutdeild hvers framleiðanda í sjóðnum í lok hvers reikningsárs.  Árlega skal séreignahluti félagsaðila í stofnsjóði vaxtareiknaður og verðbættur.  Að jafnaði skal hafa til viðmiðunar almenna sparisjóðsvexti og verðbætur í samræmi við almennar verðbreytingar í þjóðfélaginu og skulu vextir og verðbætur bætast við höfuðstól séreignahlutans. 

Arðgreiðslur sem aðalfundur ákveður að greiða skulu þó hafa forgang umfram vexti og verðbætur á séreignahluta félagsaðila.

Aðalfundur getur ákveðið hækkun séreignahluta á þann hátt að yfirfæra fjárhæðir sem eftir standa þegar félagið hefur ráðstafað hagnaði og ákveðið tillög í sjóði.  Tillagan um hækkun þarf samþykki 2/3 hluta greiddra atkvæða á aðalfundi.

21. gr.
Stofnsjóð skal nota við rekstur félagsins.  Séreignahluti í stofnsjóði skal koma til útborgunar við andlát félagsaðila eða slit félags, þ.m.t. gjaldþrot, sem aðild á að Auðhumlu.

Séreignahluti félagsaðila kemur einnig til útborgunar ef félagsaðild hans lýkur vegna þess að hann hættir mjólkurframleiðslu eða flytur af félagssvæðinu, þ.e.a.s. út fyrir þau svæði sem félagsdeildir samkvæmt 7. gr. starfa á. 

Félagsaðild lýkur við afgreiðslu ársreiknings þess árs, er viðskiptum með mjólkurinnlegg var hætt, sbr. 4. gr. samþykktanna, nema um tímabundið ástand sé að ræða og til þess liggi ástæður sem hann hefur ekki vald á.  Skal þá greiða félagsaðila að fullu séreignahluta hans eigi síðar en 1. júlí á því ári, sem á eftir fer.  Stjórn félagsins er þó heimilt að fresta greiðslu á séreignahluta í allt að 12 mánuði.

22. gr.
Minnst 10% þess hagnaðar sem ekki fer til þess að jafna hugsanlegt tap fyrri ára og ekki er lagður í aðra lögbundna sjóði samvinnufélags, skal leggja í varasjóð félagsins uns varasjóður nemur 10% af samanlagðri fjárhæð stofnsjóðs.  Þegar því marki er náð skulu framlög vera minnst 5% hagnaðar þar til sjóðurinn nemur 25% af samanlagðri fjárhæð í stofnsjóð.

Varasjóði má ráðstafa til að mæta töpum, enda fari um þá ráðstöfun samkvæmt samvinnufélagalögum.

23. gr.
Tekjuafgangi, sem greiddur er félagsaðilum, skal úthlutað eftir viðskiptamagni hvers um sig.  Heimilt er að færa tekjuafgang að nokkru eða öllu leyti til næsta árs, samkvæmt ákvörðun aðalfundar fulltrúaráðsins.


VI. KAFLI.
ÝMIS ÁKVÆÐI.

24. gr.
Ef nauðsyn þykir bera til getur fulltrúaráð að tillögu stjórnarinnar, sett reglugerð á grundvelli samþykkta þessara, er kveði nánar á um einstök framkvæmdaatriði.  Annars skal fara að venjum og fyrirmælun stjórnarinnar.

25. gr.
Um félagsslit fer eftir lögum um samvinnufélög nr. 22 frá 27. mars 1991.  Sama er um öll önnur atriði, sem ekki eru tekin fram í samþykktum þessum, en ákvæði eru um í greindum lögum.

26. gr.
Samþykktum þessum verður ekki breytt, nema á fulltrúaráðsfundi og séu að minnsta kosti 2/3 atkvæðisbærra fulltrúa samþykkir breytingunum.

Þegar leggja á fyrir fund tillögu um breytingar á félagssamþykktum, skal þess jafnan getið í fundarboði.


Þannig samþykkt á aðalfundi í Auðhumlu svf. 16. mars 2007